សមត្ថកិច្ចនគរបាលខេត្តព្រះសីហនុ បានចាប់ខ្លួនអតីតចៅសង្កាត់រងទី២ នៃសង្កាត់លេខ១ ក្រុងព្រះសីហនុ យកទៅឃុំខ្លួនជាបណ្ដោះអាសន្ននៅពន្ធនាគារខេត្តព្រះសីហនុ មានទីតាំងនៅតំបន់ក្បាលឆាយ ដោយតុលាការចោទពីបទញុះញង់ពលរដ្ឋឲ្យចូលទៅកាប់រានដីព្រៃរដ្ឋហាមឃាត់នៅតំបន់រក្សាប្រភពទឹកស្អាតក្បាលឆាយ។
សង្គមស៊ីវិលប្រចាំខេត្តនេះ កំពុងអង្កេតតាមដានទៅលើការចាប់ខ្លួនអតីតចៅសង្កាត់រងទី២ សង្កាត់លេខ១ ថាតើអាចមានជាប់ពាក់ព័ន្ធរឿងនយោបាយដែរ ឬយ៉ាងណា ព្រោះបុគ្គលត្រូវសមត្ថកិច្ចចាប់ខ្លួននេះ គឺជាមន្ត្រីមូលដ្ឋានមកពីគណបក្សសង្គ្រោះជាតិ នៅខេត្តព្រះសីហនុ។
ភរិយារបស់អតីតចៅសង្កាត់រងទី២ នៃសង្កាត់លេខ១ ក្រុងព្រះសីហនុ គឺលោកស្រី សម សារ៉ាត់ ផ្តល់សម្ភាសតាមទូរស័ព្ទឲ្យអាស៊ីសេរីដឹងថា ស្វាមីរបស់គាត់មានឈ្មោះ ឆាយ រដ្ឋ ត្រូវកម្លាំងសមត្ថកិច្ចនៃស្នងការដ្ឋាននគរបាលខេត្តព្រះសីហនុ ចាប់បញ្ជូនខ្លួនទៅឃុំក្នុងពន្ធនាគារកាលពីព្រឹកថ្ងៃអង្គារ ទី២៧ ខែមិថុនា។
លោកស្រីមិនទាន់ដឹងថា សមត្ថកិច្ចចាប់ខ្លួនស្វាមីរបស់លោកស្រីចោទពីបទអ្វីឲ្យពិតប្រាកដនោះទេ ប៉ុន្តែលោកស្រីបញ្ជាក់ថា ទំនងជាអាចជាប់ពាក់ព័ន្ធបណ្ដឹងរបស់តុលាការនាពេលកន្លងទៅ ដែលបានប្ដឹងចោទស្វាមីលោកស្រីថានៅពីក្រោយបទល្មើសញុះញង់ប្រជាពលរដ្ឋ ឲ្យចូលទៅកាប់រានដីព្រៃរដ្ឋហាមឃាត់នៅតំបន់រក្សាប្រភពទឹកស្អាតក្បាលឆាយ។
លោកស្រី សម សារ៉ាត់ ឲ្យដឹងទៀតថា នៅរសៀលថ្ងៃទី២៧ ខែមិថុនា ដដែលនេះ លោកស្រីនឹងទៅជួបមន្ត្រីពន្ធនាគារខេត្ត ដើម្បីស្នើជួបមុខស្វាមីសួរនាំអំពីការចាប់ឃុំខ្លួនបណ្ដោះអាសន្ន មានទីតាំងនៅតាមផ្លូវចូលទៅរមណីយដ្ឋានក្បាលឆាយ៖ «បញ្ហានៃការចាប់ខ្លួនប្ដីនាងខ្ញុំនេះ គឺមានតែបញ្ហារឿងកាប់បំផ្លាញព្រៃឈើ ដោយតុលាការបានចោទគាត់ពីបទញុះញង់ ដែលប្ដីខ្ញុំបានចេញមុខជួប និងជួយប្រជាពលរដ្ឋនៅសង្កាត់លេខ១ នាតំបន់ក្បាលឆាយ»។
អាស៊ីសេរី មិនអាចសុំការបំភ្លឺពីប្រធានប្រតិបត្តិគណបក្សសង្គ្រោះជាតិ ប្រចាំខេត្តព្រះសីហនុ លោក សុខ សាវ៉ាត បន្ថែមជុំវិញការចាប់ខ្លួនលោក ឆាយ រដ្ឋ អតីតចៅសង្កាត់រងទី២ សង្កាត់លេខ១ បានទេនៅរសៀលថ្ងៃទី២៧ ខែមិថុនា ដោយទូរស័ព្ទរបស់លោកទាំងពីរខ្សែបានបិទ។
ចំណែកលោក ជួន ណារិន្ទ ស្នងការនគរបាលខេត្តព្រះសីហនុ ឲ្យដឹងថា សមត្ថកិច្ចពិតជាបានចាប់ខ្លួនអតីតចៅសង្កាត់រងទី២ នៃសង្កាត់លេខ១ ពិតមែនកាលពីព្រឹកថ្ងៃអង្គារ ទី២៧ ខែមិថុនា ប៉ុន្តែលោកថា ការចាប់ខ្លួននេះ គឺកម្លាំងជំនាញនៃស្នងការដ្ឋាននគរបាលខេត្ត បានអនុវត្តទៅតាមដីកាបង្គាប់របស់សាលាដំបូងខេត្តព្រះសីហនុ ដែលបង្គាប់ឲ្យចាប់ឃុំខ្លួនជនសង្ស័យរូបនេះដាក់ពន្ធនាគារ ប៉ុន្តែលោក ជួន ណារិន្ទ មិនបានបញ្ជាក់ការចាប់ខ្លួននេះពាក់ព័ន្ធបទចោទអ្វីនោះទេ៖ «យើងអត់ដឹងថាបុគ្គលរូបនេះមានរឿងអ្វីនោះទេ ប៉ុន្តែការចាប់ខ្លួន និងឃុំខ្លួនជនសង្ស័យឈ្មោះ ឆាយ រដ្ឋ កាលពីព្រឹកថ្ងៃទី២៧ ខែមិថុនា គឺសមត្ថកិច្ចធ្វើឡើងតាមដីកាបង្គាប់របស់សាលាដំបូងខេត្តព្រះសីហនុ បង្គាប់ឲ្យចាប់ និងឃុំខ្លួននៅពន្ធនាគារខេត្តព្រះសីហនុ»។
អាស៊ីសេរី មិនអាចទាក់ទងមន្ត្រីនាំពាក្យសាលាដំបូងខេត្តព្រះសីហនុ ដើម្បីបញ្ជាក់ទៅលើដីកាចាប់ឃុំខ្លួនលោក ឆាយ រដ្ឋ ថាតើមានជាប់ពាក់ព័ន្ធបទចោទអ្វីឲ្យពិតប្រាកដបានទេ តាមទូរស័ព្ទនៅរសៀលថ្ងៃអង្គារ ទី២៧ ខែមិថុនា។
អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ អ្នកស្រី ជៀប សុធារី ឲ្យដឹងថា អ្នកស្រីកំពុងតាមដានទៅលើករណីចាប់ខ្លួនអតីតចៅសង្កាត់រងទី២ សង្កាត់លេខ១ លោក ឆាយ រដ្ឋ មកពីគណបក្សសង្គ្រោះជាតិ នេះ ដើម្បីឲ្យប្រាកដថាមានជាប់ពាក់ព័ន្ធនឹងបទចោទអ្វីឲ្យពិតប្រាកដ ឬមួយក៏មានជាប់ពាក់ព័ន្ធរឿងនយោបាយ ព្រោះបុគ្គលរូបនេះគឺជាមន្ត្រីមូលដ្ឋានសង្កាត់លេខ១ របស់គណបក្សសង្គ្រោះជាតិ ដែលឈ្នះការបោះឆ្នោតឃុំ-សង្កាត់អាណត្តិទី៤ ថ្មីៗនេះនៅសង្កាត់លេខ១។ ប៉ុន្តែអាណត្តិទី៤ នេះ លោក ឆាយ រដ្ឋ មិនត្រូវបានថ្នាក់លើរបស់ខ្លួនដាក់ឲ្យឈរឈ្មោះជាបេក្ខជនសមាជិកក្រុមប្រឹក្សាឃុំ-សង្កាត់អាណត្តិទី៤ នោះទេ ដោយសាររូបលោកមានជាប់បណ្ដឹងនៅតុលាការ។
ទាក់ទិនបញ្ហានេះ មន្ត្រីសង្គមស៊ីវិល និងប្រជាពលរដ្ឋភាគច្រើនរស់នៅខេត្តព្រះសីហនុ បានរិះគន់ថា បើការចាប់ខ្លួនលោក ឆាយ រដ្ឋ អតីតចៅសង្កាត់រងទី២ នៃសង្កាត់លេខ១ មកពីគណបក្សសង្គ្រោះជាតិ ដាក់ពន្ធនាគារទាក់ទងបណ្ដឹងប្ដឹងចោទពីបទញុះញង់ ឬនៅពីក្រោយបទល្មើសកាប់បំផ្លាញព្រៃឈើរដ្ឋហាមឃាត់នៅតំបន់ក្បាលឆាយពិតមែននោះ ក៏គួរតុលាការ ឬផ្នែកពាក់ព័ន្ធជួយដាក់ពាក្យបណ្ដឹងប្ដឹងមន្ត្រីមានឋានៈខ្ពស់ មានតួនាទីជាសមាជិកក្រុមប្រឹក្សាខេត្តព្រះសីហនុ មកពីគណបក្សប្រជាជនកម្ពុជា នៅក្នុងតំណែងរាល់ថ្ងៃ ដាក់ពន្ធនាគារ ដើម្បីឲ្យស្មើភាពគ្នា ព្រោះមន្ត្រីរូបនេះក៏មានជាប់ពាក់ព័ន្ធបទល្មើសរំលោភយកដីព្រៃអាកាស្យារបស់រដ្ឋ សម្រាប់រក្សាប្រភពទឹកស្អាតនៅតំបន់ក្បាលឆាយ អស់ជាច្រើនហិកតារ ហើយថែមទាំងបានពុះច្រៀកជាឡូត៍ៗលក់ដូរបន្តយ៉ាងអនាធិបតេយ្យ ដោយបានបំផ្លាញព្រៃឈើខ្ទេចគ្មានសល់នាពេលកន្លងទៅ ប៉ុន្តែគ្មានសមត្ថកិច្ចពីស្ថាប័នពាក់ព័ន្ធណាមួយមានដូចជា មន្ទីរបរិស្ថាន មន្ទីរកសិកម្ម និងស្ថាប័នខណ្ឌរដ្ឋបាលព្រៃឈើ ខេត្តព្រះសីហនុ ចុះស្រាវជ្រាវដាក់ពាក្យបណ្ដឹងទៅកាន់តុលាការ ឲ្យចាត់ការតាមនីតិវិធីនោះទេ៕