វិទ្យាស្ថានបង្រៀនភាសាចិន នៅប្រទេសកម្ពុជា ដែលមានឈ្មោះថា វិទ្យាស្ថាន ខុង ជឺ នៃរាជបណ្ឌិត្យសភាកម្ពុជា កំពុងប្រឹងប្រែងផ្សព្វផ្សាយ និងបង្រៀនកូនខ្មែរជាច្រើនឲ្យចេះភាសាចិន បានស្ទាត់ជំនាញ។ ការផ្សព្វផ្សាយ និងបង្រៀនភាសាចិន នៅទីក្រុងភ្នំពេញ និងតាមបណ្ដាខេត្តជាច្រើនទៀតនេះ ក៏មានភ្ជាប់ជាមួយនឹងការផ្ដល់អាហារូបករណ៍ឲ្យសិស្សទាំងឡាយណាដែលពូកែ អាចទៅបន្តការសិក្សានៅតាមសាកលវិទ្យាល័យនានាក្នុងប្រទេសចិន ថែមទៀតផង។
គណៈប្រតិភូនៃសាកលវិទ្យាល័យចំនួន៩ មកពីខេត្តគួយចូវ (Gui Zhou) នៃប្រទេសចិន បានមកបំពេញទស្សនកិច្ចនៅវិទ្យាល័យអង្គរ ក្នុងទីរួមខេត្តសៀមរាប។
ទស្សនកិច្ចនេះ ក្នុងគោលបំណងផ្សព្វផ្សាយអំពីសក្ដានុពលនៃវិស័យអប់រំរបស់គេ ព្រមទាំងប្រកាសផ្ដល់អាហារូបករណ៍ឲ្យសិស្សខ្មែរណាដែលចេះភាសាចិន និងរៀនពូកែផងនោះ។ ដំណើរទស្សនកិច្ចនៃគណៈប្រតិភូសាកលវិទ្យាល័យនេះ ធ្វើឡើងនៅក្រោយពេលមួយថ្ងៃបន្ទាប់ពីគណៈអភិបាលខេត្តគួយចូវ (Gui Zhou) របស់ចិន បានចុះហត្ថលេខាលើអនុស្សរណៈនៃការយោគយល់គ្នាជាមួយអភិបាលខេត្តសៀមរាប លើកិច្ចសហប្រតិបត្តិការវិស័យអប់រំ វប្បធម៌ វិស័យទេសចរណ៍ និងវិស័យសុខាភិបាល ជាដើម។
នាយកវិទ្យាល័យអង្គរ ដែលជាអ្នករៀបចំទទួលគណៈប្រតិភូសាកលវិទ្យាល័យមកពីខេត្តគួយចូវ របស់ចិន នោះ គឺលោក រិន ឡូត។ លោកមានប្រសាសន៍កាលពីល្ងាចថ្ងៃសៅរ៍ ទី២៤ ខែមិថុនា ថា ទស្សនកិច្ចរបស់គណៈប្រតិភូនៃសាកលវិទ្យាល័យខេត្តគួយចូវ មកកាន់សាលារបស់លោកពេលនេះ ក្នុងបំណងផ្ដល់អាហារូបករណ៍ឲ្យសិស្សខ្មែរមានឱកាសទៅសិក្សានៅឯប្រទេសចិន។
លោក រិន ឡូត បញ្ជាក់ថា មូលហេតុដែលសាកលវិទ្យាល័យខេត្តគួយចូវ របស់ចិន ផ្ដល់អាហារូបករណ៍មកឲ្យសាលារបស់លោក ពីព្រោះតែមានសិស្សខ្លះបានរៀនភាសាចិន រយៈពេល ៦ឆ្នាំមកហើយ៖ «ពាក់ព័ន្ធនឹងអាហារូបករណ៍ដែលសាកលវិទ្យាល័យផ្ដល់ឲ្យនេះ គឺពាក់ព័ន្ធទៅលើសិស្សដែលរៀនភាសាចិន ហើយប្រឡងយកភាសាចិន ក្នុងកម្រិតខ្ពស់ ដែលអាចចេញទៅសិក្សានៅសាកលវិទ្យាល័យទាន់គេ»។
វិទ្យាល័យអង្គរ គឺជាសាលាតែមួយគត់នៅក្នុងខេត្តសៀមរាប ដែលមានបើកបង្រៀនភាសាចិន ហើយសាកលវិទ្យាល័យនានារបស់ចិន តែងមកទាក់ទងផ្ដល់អាហារូបករណ៍។
នេះជាលើកទីពីរហើយដែលសាកលវិទ្យាល័យនៅប្រទេសចិន បានផ្ដល់អាហារូបករណ៍ឲ្យសិស្សវិទ្យាល័យអង្គរ បានទៅបន្តការសិក្សាថ្នាក់បរិញ្ញាបត្រ និងបរិញ្ញាបត្រជាន់ខ្ពស់នៅឯប្រទេសចិន។
កាលពីថ្ងៃទី២៤ ខែមិថុនា អ្នកគ្រប់គ្រងមកពីសាកលវិទ្យាល័យចំនួន៩ ក្នុងខេត្តគួយចូវ បានឡើងធ្វើបទបង្ហាញអំពីគុណសម្បត្តិនៃសាលារបស់ពួកគេរៀងៗខ្លួន ហើយសាកលវិទ្យាល័យមួយក្នុងចំណោមសាកលវិទ្យាល័យទាំងនោះ បានប្រកាសផ្ដល់អាហារូបករណ៍ឲ្យសិស្សវិទ្យាល័យអង្គរចំនួន ៥នាក់ បានទៅបន្តការសិក្សានៅប្រទេសចិន ចំណែកសាកលវិទ្យាល័យផ្សេងទៀត នឹងជូនដំណឹងពីអាហារូបករណ៍តាមផ្លូវការ។
នាយកសាខាវិទ្យាស្ថាន ខុង ជឺ នៃរាជបណ្ឌិត្យសភាកម្ពុជា ប្រចាំវិទ្យាល័យអង្គរ លោក លាវ ចិន (Liu Zhen) ឲ្យដឹងថា សាកលវិទ្យាល័យចំនួន៩ នៃខេត្តគួយចូវ របស់ចិន ដែលមកផ្ដល់អាហារូបករណ៍ឲ្យសិស្សនៅវិទ្យាល័យអង្គរនេះ គឺជាសាកលវិទ្យាល័យល្បីៗខាងផ្នែកសេដ្ឋកិច្ច ហិរញ្ញវត្ថុ និងផ្នែកគរុកោសល្យ ជាដើម។ សាកលវិទ្យាល័យទាំងនេះសុទ្ធតែចង់ឲ្យសិស្សនៅវិទ្យាល័យអង្គរ បានចេញទៅបន្តការសិក្សានៅខេត្តគួយចូវ៖ «នៅដើមខែកញ្ញា ឆ្នាំ២០១៧ នេះ គឺនឹងមានសិស្សរបស់វិទ្យាល័យអង្គរ នៃខេត្តសៀមរាប ខ្លះ អាចនឹងទទួលបានអាហារូបករណ៍ ហើយចេញទៅបន្តការសិក្សានៅតាមសាកលវិទ្យាល័យនៃខេត្តគួយចូវ របស់ប្រទេសចិន ហើយ។ ទោះជាយ៉ាងណា លក្ខខណ្ឌនៃសិស្សដែលទទួលបានអាហារូបករណ៍នេះ គឺទាល់តែចេះភាសាចិន ក្នុងកម្រិតខ្ពស់ដូចជាកម្រិត HSK និងកម្រិត HSCK ជាដើម»។
អនុប្រធានការិយាល័យមធ្យមសិក្សារបស់មន្ទីរអប់រំ យុវជន និងកីឡាខេត្តសៀមរាប លោក សាប់ សាខា ដែលចូលរួមមើលបទបង្ហាញរបស់សាកលវិទ្យាល័យទាំង៩ នៃខេត្តគួយចូវ មានប្រសាសន៍ថា ការបង្ហាញពីសម្ភារៈសិក្សាទំនើបៗរបស់សាកលវិទ្យាល័យ ព្រមទាំងមានទេសភាពដ៏ស្រស់ស្អាតគួរឲ្យទាក់ទាញផងនោះ គឺជាការចាប់ចិត្តយ៉ាងខ្លាំង។
លោក សាប់ សាខា ជំរុញឲ្យសិស្សានុសិស្សនៅវិទ្យាល័យអង្គរ ត្រូវចាប់អារម្មណ៍ទៅលើអាហារូបករណ៍របស់សាកលវិទ្យាល័យទាំង៩ របស់ខេត្តគួយចូវ នៃប្រទេសចិន នេះ៖ «បើសិនជាប្អូនៗមានការចាប់អារម្មណ៍ ប្អូនៗត្រូវធ្វើការវិភាគស្វែងយល់ ហើយត្រូវខិតខំរៀនសូត្រឲ្យបានពូកែ ដើម្បីយកអាហារូបករណ៍ទៅសិក្សានៅប្រទេសចិន»។
វិទ្យាស្ថាន ខុង ជឺ នៃរាជបណ្ឌិត្យសភាកម្ពុជា ឲ្យដឹងថា ចាប់តាំងពីអំឡុងឆ្នាំ២០១១ មក គេបានជួយបណ្ដុះបណ្ដាល និងធ្វើសម្ភាសសិស្សនិស្សិតខ្មែរជាច្រើនដែលស្នើសុំអាហារូបករណ៍ ឲ្យចេញទៅបន្តការសិក្សាថ្នាក់បរិញ្ញាបត្រ បរិញ្ញាបត្រជាន់ខ្ពស់នៅតាមសាកលវិទ្យាល័យនានាក្នុងប្រទេសចិន ជាហូរហែ ក៏ប៉ុន្តែគេមិនប្រាកដថា ក្នុងរយៈពេល ៦ឆ្នាំមកនេះ តើមានសិស្ស និងនិស្សិតខ្មែរចំនួនប៉ុន្មាននាក់ពិតប្រាកដទេ ដែលបានទទួលអាហារូបករណ៍ទៅសិក្សានៅឯប្រទេសចិន បើគិតរហូតមកដល់ពេលនេះ៕