Clik here to view.
ពលរដ្ឋជាង ៣០នាក់ មកពីសហគមន៍មានបញ្ហាដីធ្លីចំនួន៤ ប្រមូលផ្ដុំគ្នាតវ៉ានៅមុខក្រសួងដែនដី នគរូបនីយកម្ម និងសំណង់ នៅព្រឹកថ្ងៃទី២២ មិថុនា ដោយស្រែកទាមទារឲ្យលោករដ្ឋមន្ត្រីជួយដោះស្រាយបញ្ហាដីធ្លីរបស់ពួកគាត់។ ប៉ុន្តែការតវ៉ានេះធ្វើទៅបានបន្តិច អ្នកភូមិក៏រំសាយវិញ ព្រោះមន្ត្រីក្រសួងដែនដី នគរូបនីយកម្ម និងសំណង់ ប្រាប់ពួកគាត់ថា ក្រសួងបានបញ្ជូនករណីនេះទៅសាលារាជធានីភ្នំពេញ វិញហើយ។
អ្នកបឹងកក់ម្នាក់ ក្នុងចំណោមអ្នកបឹងកក់ ដែលមិនទាន់ទទួលបានដំណោះស្រាយ ៧គ្រួសារ គឺលោកស្រី ហុង សុខខេង មានប្រសាសន៍ថា ពួកលោកស្រីនឹងរង់ចាំរហូតដល់ចុងខែ ទើបទៅសួរសាលារាជធានីភ្នំពេញ៖ «គេឲ្យយើងទៅតាមដាននៅក្រុង តែខ្ញុំបដិសេធវិញ។ អម្បាញ់មិញថា ខ្ញុំអត់ទាន់ទៅសួរទេ ព្រោះនៅអភិបាលចាស់។ ខ្ញុំចាំដល់អភិបាលថ្មី ខ្ញុំនឹងទៅសួរ ព្រោះលទ្ធផលដែលរដ្ឋសភាស៊ីញេចូលដែនដី ដែនដីគេបានផ្ញើយកទៅឲ្យក្រុងអ្នកដោះស្រាយ។ អ៊ីចឹងខ្ញុំផុតថ្ងៃទី២៨ មិថុនា គេប្រកាសឯកឧត្ដម ឃួង ស្រេង ឡើងថ្មី បានខ្ញុំនឹងតស៊ូមតិទៅសួរចៅហ្វាយក្រុងថ្មីទៀត តើគាត់មានលទ្ធផលយ៉ាងណា ដែលក្រដាសខាងរដ្ឋសភាបញ្ជូនមកដែនដី ឥឡូវដែនដីបានបញ្ជូនសំណុំរឿងហ្នឹងយកទៅឲ្យទៀត។ តើគាត់មានសមត្ថភាពដោះស្រាយឲ្យខ្ញុំ ឬគាត់បង្វិលសំណុំរឿងហ្នឹងយកមកឲ្យដែនដីដោះឲ្យពួកខ្ញុំវិញ?»។
ក្រុមលោកស្រី ហុង សុខខេង ធ្លាប់បដិសេធការដោះស្រាយរបស់អភិបាលចាស់ លោក ប៉ា សុជាតិវង្ស ដែលសម្រេចប្រគល់ដីឲ្យពួកគាត់ ១០% នៃដីពួកគាត់ធ្លាប់កាន់កាប់។ ពួកគាត់ចង់បាន ៥៣% នៃទំហំដីចាស់នោះ។
អ្នកភូមិទាំងនេះ ធ្លាប់រកអន្តរាគមន៍ពីព្រះមហាក្សត្រ ក្រសួងព្រះបរមរាជវាំង ខុទ្ទកាល័យលោកនាយករដ្ឋមន្ត្រី និងរដ្ឋសភា ជាបន្តបន្ទាប់ កាលពីខែមីនា និងខែឧសភា។ ការមកប្រមូលផ្ដុំគ្នានៅក្រសួងដែនដី នគរូបនីយកម្ម និងសំណង់ គឺដើម្បីតាមដានញត្តិរបស់ពួកគាត់ ដែលកាលពីថ្ងៃទី២០ ខែមេសា ប្រធានរដ្ឋសភា លោក ហេង សំរិន បានចារបញ្ជូនករណីអ្នកបឹងកក់ សេសសល់ ៧គ្រួសារ ទៅឲ្យក្រសួងដែនដី ដោះស្រាយ។
អ្នកភូមិទាំងនេះ មកពីសហគមន៍បុរីកីឡា ៣ មករា សហគមន៍ព្រះលានយន្តហោះ អេស.អូ.អេស (SOS) អតីតអ្នកសហគមន៍បឹងកក់ និងអ្នកបឹងកក់ ៧គ្រួសារ ដែលមិនទាន់មានដំណោះស្រាយ៕
