ប្រធានរដ្ឋសភាលោក ហេង សំរិន ទៅបំពេញទស្សនកិច្ចផ្លូវការ និងមិត្តភាពនៅប្រទេសវៀតណាម និងប្រទេសឡាវ ចំនួន៦ថ្ងៃ ដោយចេញដំណើរនៅព្រឹកថ្ងៃទី២១ មិថុនា រហូតដល់ថ្ងៃទី២៦ មិថុនា ទើបត្រឡប់មកកម្ពុជាវិញ។
សេចក្ដីប្រកាសព័ត៌មានរបស់រដ្ឋសភាឲ្យដឹងថា លោក ហេង សំរិន និងគណៈប្រតិភូជាន់ខ្ពស់រដ្ឋសភាចាប់ផ្ដើមទស្សនកិច្ចដំបូងនៅប្រទេសឡាវ ចាប់ពីថ្ងៃទី២១ ដល់ថ្ងៃទី២៣ មិថុនា។
ទស្សនកិច្ចនេះលោក ហេង សំរិន គ្រោងជួបពិភាក្សាការងារទ្វេភាគីជាមួយប្រធានរដ្ឋសភាឡាវ អ្នកស្រី បានី យ៉ាធូតូ (Panny Yathotuo) និងជួបនាយករដ្ឋមន្ត្រីឡាវ លោក ថនលួន ស៊ីសូលីត (Thongloun Sisolith) រួមនឹងប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ លោក ប៊ុនញាំង វ៉ូរ៉ាជិត (Bounhang Vorachit) ផង។
លុះចាប់ពីថ្ងៃទី២៣ ដល់ថ្ងៃទី២៦ មិថុនា លោក ហេង សំរិន ចាប់ផ្ដើមទស្សនកិច្ចទៅប្រទេសវៀតណាម ដោយគម្រោងជួបពិភាក្សាការងារទ្វេភាគីជាមួយប្រធានរដ្ឋសភាវៀតណាម អ្នកស្រី ង្វៀនធី គីមង៉ាន (NGUYEN KIM NGAN) និងនាយករដ្ឋមន្ត្រីវៀតណាម លោក ង្វៀន សួនហ្វុក (NGUYEN XUAN PHUC) និងមន្ត្រីជាន់ខ្ពស់របស់វៀតណាមផ្សេងទៀត។
ក្នុងដំណើរទស្សនកិច្ចនោះដែរ លោក ហេង សំរិន នឹងចូលរួមកម្មវិធីនៃការប្រារព្ធខួប លើកទី៥០ នៃការបង្កើតទំនាក់ទំនងការទូតកម្ពុជា-វៀតណាម និងចូលរួមកម្មវិធីកិច្ចប្រជុំរណសិរ្សបីប្រទេស គឺកម្ពុជា វៀតណាម និងឡាវ៕