ចៅក្រមសាលាដំបូងខេត្តកំពង់ឆ្នាំង សម្រេចផ្ដន្ទាទោសគ្រូបង្រៀនម្នាក់ឲ្យជាប់ពន្ធនាគាររយៈពេល ៥ឆ្នាំ និងពិន័យប្រាក់ជាច្រើនលានរៀល ពីបទប្រទូសកេរ្តិ៍ខ្មាសលើសិស្សស្រីរបស់ខ្លួនជាច្រើននាក់នៅក្នុងថ្នាក់រៀន។ ចៅក្រមប្រកាសបិទផ្លូវប្ដឹងឧទ្ធរណ៍ ប៉ុន្តែមេធាវីការពារក្ដីឲ្យជនជាប់ចោទអះអាងថា ខ្លួននឹងជួបពិភាក្សាជាមួយកូនក្ដីដើម្បីរកនីតិវិធីប្ដឹងទាស់ចំពោះសាលក្រមដែលបានសម្រេចនេះ។
សវនាការអសាធារណៈជិត ៦ម៉ោង ចាប់តាំងពីព្រឹករហូតដល់រសៀលថ្ងៃទី២០ ខែមិថុនា នៅសាលាដំបូងខេត្តកំពង់ឆ្នាំង បានសួរដេញដោលសាក្សីបំភ្លឺសំណុំរឿង សាក្សីជនរងគ្រោះ និងសាក្សីជនជាប់ចោទជិត ២០នាក់។ ចៅក្រម និងតំណាងអយ្យការ ព្យាយាមវែកញែករកខុសត្រូវលើទង្វើរបស់គ្រូបង្រៀនឈ្មោះ កែម ចាន់ឆេន ដែលសិស្សអះអាងថាបានបៀតបៀនលើសិស្សស្រី និងឱបថើបពួកគេ ជាដើម។
នៅក្នុងបន្ទប់សវនាការដែលអ្នកឃ្លាំមើលសិទ្ធិមនុស្ស អ្នកសារព័ត៌មានជាតិ និងអន្តរជាតិ អាចស្ដាប់ ឬអើតមើលតាមបង្អួចបានម្ដងៗនោះ លោកចៅក្រម ហម ម៉េងសែ ថ្លែងថា ការសម្រេចបិទទ្វារដើម្បីបើកសវនាការ ព្រោះខ្លាចប៉ះពាល់ដល់កិត្តិយសរបស់គូភាគី។ ចៅក្រមបានផ្អាកការតតាំងគ្នាតាមនីតិវិធីរវាងតំណាងអយ្យការ ជាមួយមេធាវីការពារក្ដីឲ្យជនជាប់ចោទ បន្ទាប់ពីលើកហេតុផលម្នាក់ពីរដងនៅក្នុងសេចក្ដីសន្និដ្ឋានចុងក្រោយនៃសវនាការ ហើយសម្រាកបន្តិច ទើបប្រកាសសាលក្រមដែលបិទផ្លូវប្ដឹងឧទ្ធរណ៍តែម្ដង។
សាលក្រមប្រកាសផ្ដន្ទាទោសលោក កែម ចាន់ឆេន ដាក់ពន្ធនាគារ ៥ឆ្នាំ និងបង្គាប់ឲ្យបង់ប្រាក់ចំនួន ១០លានរៀលចូលរដ្ឋ និងជាច្រើនលានរៀលទៀតបង់ឲ្យជនរងគ្រោះ។ ចៅក្រមក៏បានបង្គាប់ឲ្យចេញដីកាចាប់ខ្លួន និងដាក់ពន្ធនាគារដែរ។
អតីតគ្រូបង្រៀនថ្នាក់ទី៦ នៃសាលាបឋមសិក្សាថ្មកែវ ឋិតនៅឃុំស្វាយជ្រុំ ស្រុករលាប្អៀរ ឈ្មោះ កែម ចាន់ឆេន ត្រូវអាណាព្យាបាលសិស្ស ៤នាក់ ប្ដឹងថាបានបៀតបៀនកេរ្តិ៍ខ្មាសសិស្សកាលពីឆ្នាំ២០១៣ ដោយចាប់ឱបថើបនៅក្នុងថ្នាក់រៀន និងនៅកន្លែងរៀនគួរដែលជាផ្ទះលោក កែម ចាន់ឆេន ផ្ទាល់។ សាក្សីជាច្រើនបានបញ្ជាក់ថា លោក កែម ចាន់ឆេន ពិតជាបានប្រព្រឹត្តដូច្នេះមែន។
ឪពុករបស់កុមារីរងគ្រោះម្នាក់ក្នុងចំណោម ៤នាក់ ថ្លែងទាំងសប្បាយចិត្តដោយដៃម្ខាងកាន់បាយកញ្ចប់ហូបបណ្ដើរ ក្រោយចេញពីសវនាការភ្លាមថា យុត្តិធម៌ដែលគ្រួសារលោក និងក្មេងសិស្សសាលាផ្សេងទៀតរង់ចាំតាំងពីពាក់កណ្ដាលឆ្នាំ២០១៣ ទើបទទួលបាននៅថ្ងៃនេះ។ លោកចង់ឃើញសមត្ថកិច្ចចាប់ជនល្មើសមកផ្ដន្ទាទោស និងបង្ខំឲ្យបង់ប្រាក់សំណងដើម្បីប៉ះប៉ូវកេរ្តិ៍ឈ្មោះ និងអនាគតក្មេងៗ ព្រោះបច្ចុប្បន្ន ក្មេងខ្លះបានឈប់រៀន និងខ្លះនៅបន្តរៀនទាំងខ្មាសគេ៖ «អរគុណអ្នកកាត់ក្ដីមួយកម្រិតដែរ ដែលខំជួយខ្នះខ្នែងកិត្តិយស តាំងកូនគេកូនយើង វាអ៊ីចឹងហើយ។ វាខានរៀនខានអីអស់រលីង។ វារវល់តែខ្មាសគេ។ ម្ល៉ោះហើយបានតុលាការកាត់ក្ដីហ្នឹងបានយុត្តិធម៌ អរគុណណាស់»។
ចំណែកមេធាវីម្នាក់ក្នុងចំណោមពីរនាក់ដែលការពារក្ដីឲ្យជនជាប់ចោទ ខណៈមេធាវីភាគីជនរងគ្រោះអវត្តមាននោះ លោកមេធាវី គា អ៊ាវ ថាលោកនឹងជួបកូនក្ដីដើម្បីប្ដឹងទាស់នឹងការសម្រេចនេះ៖ «ខ្ញុំយល់ថា រឿងហ្នឹងជារឿងតូចតាចទេ។ វាជារឿងអសីលធម៌របស់គ្រូម្នាក់ដែលគាត់ឆ្លៀតយកចំណេញ ដូចថាគាត់ចូលចិត្តទៅឱបកៀកកសិស្សពីក្រោយ ស្ទាបអង្អែលញីក្បាលសិស្ស ហើយតែងតែចូលទៅនិយាយជាមួយសិស្សរាងឱនជិតមុខសិស្សដូចថើប អាហ្នឹងវាជារឿងមួយខ្ញុំថាជារឿងអសីលធម៌មួយដែរ ជារឿងមិនល្អ ប៉ុន្តែវាមិនមែនជារឿងកំហុសផ្លូវច្បាប់ខុសវិធានក្នុងបទល្មើស ដែលចោទពីបទប្រទូសកេរ្តិ៍ខ្មាសទេ។ ប្រទូសកេរ្តិ៍ខ្មាស ទាល់តែវាទៅស្ទាបច្របាច់»។
មន្ត្រីអង្គការការពារសិទ្ធិមនុស្សលីកាដូ (LICADHO) ប្រចាំខេត្តកំពង់ឆ្នាំង លោក គង់ ច័ន្ទមុនី យល់ថា មេធាវីអាចរកនីតិវិធីប្ដឹងទាស់បន្តទៀត នៅពេលដែលមានការកាត់ទោសកំបាំងមុខជនជាប់ចោទ។ លោកថា តាមគោលការណ៍ទទួលបានយុត្តិធម៌ ទាល់តែភាគីជនរងគ្រោះទទួលបានសំណងជំងឺចិត្ដ ហើយអ្នកប្រព្រឹត្តកំហុស ត្រូវតែនាំមកអនុវត្ដទោសទៅតាមអំណាចនៃសាលក្រមរបស់តុលាការ៕