Clik here to view.
គ្រូពេទ្យអង្គការលីកាដូ (LICADHO) អះអាងនៅថ្ងៃទី១៩ មិថុនា ថា ពួកគាត់មិនទាន់បានចូលក្នុងពន្ធនាគារដើម្បីព្យាបាលលោក នី សុខា ដែលដួលសន្លប់ក្នុងបន្ទប់ទឹកដូចដែលអ្នកនាំពាក្យពន្ធនាគារអះអាងកាលពីថ្ងៃទី១៨ មិថុនា នោះទេ។ គ្រូពេទ្យលីកាដូ បញ្ជាក់ថា រូបគាត់ព្យាយាមចង់ចូលទៅពន្ធនាគារ ដើម្បីពិនិត្យមើលអាការៈរបស់លោក នី សុខា មន្ត្រីសិទ្ធិមនុស្សអាដហុក ក៏ប៉ុន្តែមន្ត្រីពន្ធនាគារមិនអនុញ្ញាតឲ្យចូលនោះទេមកទល់ពេលនេះ។
មេធាវីការពារក្តីឲ្យលោក នី សុខា ថានឹងដាក់លិខិតទៅចៅក្រមសាលាដំបូងក្រុងភ្នំពេញ ស្នើសុំឲ្យមន្ត្រីសិទ្ធិមនុស្សអាដហុក លោក នី សុខា បានមកព្យាបាលជំងឺនៅមន្ទីរពេទ្យក្រៅពន្ធនាគារ។
ប្អូនប្រុសរបស់លោក នី សុខា គឺលោក នី លីហេង ឲ្យដឹងនៅថ្ងៃទី១៩ មិថុនា ថា លោកបានទៅជួបសួរសុខទុក្ខបងប្រុសរបស់លោកនៅពន្ធនាគារ ឃើញលោក នី សុខា មានទឹកមុខស្លេកស្លាំង ញ័រដៃ និងព្យួរសេរ៉ូមផង។ លោកថា បងប្រុសរបស់លោកពិតជាដួលសន្លប់នៅបន្ទប់ទឹកក្នុងពន្ធនាគារមែន៖ «ខ្ញុំបានជួបគាត់ព្រឹកមិញ គាត់បានដួលនៅក្នុងបន្ទប់នៃពន្ធនាគារមែន។ គាត់ដួលមួយសន្ទុះ ទើបបានអ្នកនៅក្នុងបន្ទប់ជួយ»។
លោកថា ទោះគ្រូពេទ្យនៅពន្ធនាគារបានយកចិត្តទុកដាក់ព្យាបាលបងប្រុសរបស់លោកក្តី ប៉ុន្តែលោកព្រួយបារម្ភថា ស្ថានភាពជំងឺរបស់លោក នី សុខា ធ្ងន់ធ្ងរលើសពីលទ្ធភាពគ្រូពេទ្យនៅពន្ធនាគារ។
មេធាវីការពារក្តីរបស់លោក នី សុខា គឺលោក ឡោ ជុនធី ប្រាប់ថា ក្រោយពីឃើញស្ថានភាពជំងឺកូនក្តីលោក ក្រុមមេធាវីសម្រេចសរសេរលិខិតទៅចៅក្រមសាលាដំបូងរាជធានីភ្នំពេញ ដែលកាន់សំណុំរឿងលោក នី សុខា ដើម្បីស្នើឲ្យលោក នី សុខា អាចចេញមកពិនិត្យសុខភាព និងព្យាបាលជំងឺនៅពេទ្យក្រៅពន្ធនាគារបាន៖ «ស្អែកហ្នឹង យើងប្រជុំគ្នា ហើយយើងដាក់លិខិតតែម្តង»។
លោក នី សុខា បានដួលសន្លប់ក្នុងបន្ទប់ទឹកនៃពន្ធនាគារ «ម១» រាជធានីភ្នំពេញ កាលពីថ្ងៃទី១៨ ខែមិថុនា។ នៅពេលលោកដួលសន្លប់នោះ ត្រូវបានអ្នកនាំពាក្យពន្ធនាគារ លោក នុត សវនា និយាយថា លោក នី សុខា គ្រាន់តែរាករូសប៉ុណ្ណោះ។ លោកថា មន្ត្រីពន្ធនាគាររាយការណ៍ប្រាប់លោកថា លោក នី សុខា ត្រូវបានក្រុមគ្រូពេទ្យនៃអង្គការលីកាដូ ជួយពិនិត្យរួចរាល់ហើយ ប៉ុន្តែនៅថ្ងៃទី១៩ ខែមិថុនា លោកថាមន្ត្រីពន្ធនាគារផ្តល់ព័ត៌មានមកលោកខុស មិនមែនពេទ្យអង្គការលីកាដូទេ គឺពេទ្យរបស់ពន្ធនាគារ។
ប្រធានផ្នែកអង្កេតនៃអង្គការសិទ្ធិមនុស្សលីកាដូ លោក អំ សំអាត និយាយថា ចៅក្រមមិនទាន់អនុញ្ញាតឲ្យគ្រូពេទ្យនៃអង្គការលីកាដូ បានជួបលោក នី សុខា ដើម្បីព្យាបាលជំងឺនៅឡើយទេ។ លោក អំ សំអាត ប្រាប់ថា អស់រយៈពេលជាងបីខែមកហើយដែលគ្រូពេទ្យអង្គការលីកាដូ មិនបានពិនិត្យ និងព្យាបាលលោក នី សុខា និងមន្ត្រីអាដហុកពីររូបផ្សេងទៀត គឺលោក យី សុខសាន្ត និងលោក ណៃ វ៉ង់ដា ដែលកំពុងមានជំងឺដូចគ្នា ព្រោះមានការហាមឃាត់ពីចៅក្រមសាលាដំបូងក្រុងភ្នំពេញ៖ «យើងមិនទាន់អាចសន្និដ្ឋានទៅលើរោគវិនិច្ឆ័យគាត់បាននៅឡើយទេនៅពេលនេះ ព្រោះគ្រូពេទ្យអង្គការលីកាដូមិនទាន់បានជួបគាត់ (លោក នី សុខា)»។
លោក អំ សំអាត បញ្ជាក់ថា ក្រសួងមហាផ្ទៃ បានអនុញ្ញាតឲ្យគ្រូពេទ្យអង្គការលីកាដូ អាចពិនិត្យ និងព្យាបាលចំនួន ១១ពន្ធនាគារទូទាំងប្រទេស ក្នុងនោះក៏មានពន្ធនាគារ «ម១» ដែរ។ ប៉ុន្តែលោកថា កាលពីប៉ុន្មានខែមុន ក្រសួងមហាផ្ទៃ ហាមមិនឲ្យគ្រូពេទ្យអង្គការលីកាដូ ចូលទៅព្យាបាលមន្ត្រីអាដហុក បីរូប គឺលោក នី សុខា លោក យី សុខសាន្ត និងលោក ណៃ វ៉ង់ដា។ លោកថា បើគ្រូពេទ្យអង្គការលីកាដូ ចង់ព្យាបាលអ្នកទាំងបីរូប លុះត្រាសុំការអនុញ្ញាតពីតុលាការជាមុនសិន។
មន្ត្រីការពារសិទ្ធិមនុស្សនៃសមាគមអាដហុក ចំនួន ៤រូប និងលោក នី ចរិយា អគ្គលេខាធិការរងនៃ គ.ជ.ប ត្រូវបានអង្គភាពប្រឆាំងអំពើពុករលួយរបស់លោក ឱម យ៉ិនទៀង ចោទប្រកាន់ និងចាប់ខ្លួនក្រោមហេតុផលសមគំនិត និងសូកប៉ាន់សាក្សីកាលពីចុងខែមេសា ឆ្នាំ២០១៦ ជុំវិញស្នេហាដែលគេចោទរវាងលោក កឹម សុខា និងអ្នកនាង ខុម ចាន់តារាទី ហៅស្រីមុំ។ តុលាការបានឃុំខ្លួនអ្នកទាំង ៥រូបជាងមួយឆ្នាំទៅហើយ ដោយមិនទាន់កាត់ក្តី។
អ្នកនាំពាក្យពន្ធនាគារនៃក្រសួងមហាផ្ទៃ លោក នុត សវនា ថាករណីគ្រូពេទ្យអង្គការលីកាដូអាចចូល ឬមិនអាចចូលពន្ធនាគារព្យាបាលលោក នី សុខា ជាសមត្ថកិច្ចរបស់តុលាការ ដែលហួសពីការសម្រេចរបស់ពន្ធនាគារ។ លោកថា បើជំងឺលោក នី សុខា លើសពីលទ្ធភាពគ្រូពេទ្យនៅពន្ធនាគារ ខាងពន្ធនាគារនឹងបញ្ជូនលោក នី សុខា ទៅព្យាបាលក្រៅពន្ធនាគារ ប៉ុន្តែក្រោមការឃ្លាំមើលរបស់ក្រុមសមត្ថកិច្ច៕