តុលាការខេត្តកំពង់ធំ សម្រេចឃុំខ្លួនអ្នកសារព័ត៌មានក្នុងស្រុកម្នាក់ និងមន្ត្រីអង្គការការពារធនធានធម្មជាតិ និងសត្វព្រៃនៅកម្ពុជា ម្នាក់ នៅពន្ធនាគារខេត្តបណ្ដោះអាសន្ន ក្រោមបទចោទកំហែងយកប្រាក់ពីពលរដ្ឋ។ ករណីនេះធ្វើឡើងដោយមានពាក្យបណ្ដឹងពីពលរដ្ឋម្នាក់នៅក្រុងស្ទឹងសែន ដោយអះអាងថាពួកគេទាំងពីរនាក់បានបំភិតបំភ័យ និងទារប្រាក់ពីខ្លួនជិត ១ពាន់ដុល្លារ។
ព្រះរាជអាជ្ញាអមសាលាដំបូងខេត្តកំពង់ធំ លោក អ៊ិត សុធា មានប្រសាសន៍នៅថ្ងៃទី១៤ មិថុនា ថា តុលាការសម្រេចឃុំខ្លួនអ្នកកាសែតម្នាក់ និងមន្ត្រីអង្គការការពារធនធានធម្មជាតិម្នាក់ ក្រោមបទចោទកំហែងយកប្រាក់ចំនួន ៨០០ដុល្លារពីពលរដ្ឋម្នាក់រស់នៅក្រុងស្ទឹងសែន ដែលធ្វើឡើងកាលពីថ្ងៃទី៩ មិថុនា ខណៈពលរដ្ឋរូបនោះយកត្រាក់ទ័រទៅស៊ីឈ្នួលភ្ជួរដីឲ្យអ្នកភូមិជាមួយគ្នា។
ក្រោយមក ពលរដ្ឋជាម្ចាស់ត្រាក់ទ័រដាក់ពាក្យប្ដឹងទៅសមត្ថកិច្ច ហើយក៏ឈានដល់ការចាប់ខ្លួនអ្នកទាំងពីរកាលពីថ្ងៃទី១២ មិថុនា។
លោកបន្តថា សំណុំរឿងនេះបានបញ្ជូនទៅដល់ដៃចៅក្រមស៊ើបសួរដើម្បីបន្តនីតិវិធី ហើយជនសង្ស័យត្រូវបានតុលាការបញ្ជូនទៅឃុំនៅពន្ធនាគារខេត្តកាលពីថ្ងៃទី១៣ មិថុនា៖ «តាមការពិត សំណុំរឿងនេះមិនមែនមានតែមួយទេ គឺមានច្រើនណាស់ដែលពាក្យបណ្ដឹងពលរដ្ឋប្ដឹងមកខ្ញុំ។ បាទ! ប្ដឹងពីរនាក់ហ្នឹងឈ្មោះ ថន ប៉ុន្មានករណី? ប៉ុន្តែកន្លងមកយើងរកវាមិនឃើញ»។
ជនសង្ស័យទាំងពីរនាក់រួមមានឈ្មោះ ពៅ ប៊ុនថន ភេទប្រុស ជាភ្នាក់ងារសារព័ត៌មានជាតិខ្មែរ និងម្នាក់ទៀតឈ្មោះ ប៉ាង យ៉ាត ភេទប្រុស ជាសមាជិកអង្គការការពារធនធានធម្មជាតិ និងសត្វព្រៃនៅកម្ពុជា។
ព្រះរាជអាជ្ញាដដែលបញ្ជាក់ថា ចៅក្រមស៊ើបសួរ នឹងស្រាវជ្រាវបន្ត ហើយប្រសិនបើរកឃើញថាករណីនេះមានអ្នកពាក់ព័ន្ធបន្ថែមទៀត គឺជាសិទ្ធិរបស់ចៅក្រម ដើម្បីចាត់វិធានការតាមច្បាប់។
អាស៊ីសេរី មិនអាចទាក់ទងអ្នកកាសែត និងមន្ត្រីការពារធនធានធម្មជាតិ ទាំងពីរនាក់ និងស្ថាប័នរបស់ពួកគេបានទេនៅថ្ងៃទី១៤ មិថុនា។
យ៉ាងនេះក្តី ស្នងការរងនគរបាលខេត្តកំពង់ធំ លោក ខាន់ ណារ៉ា បានបញ្ជាក់ប្រាប់កាសែតភ្នំពេញប៉ុស្តិ៍ថា ពួកគាត់ពិតជាបានធ្វើសកម្មភាពដូចការចោទប្រកាន់មែន ប៉ុន្តែពួកគេបដិសេធចំនួនទឹកប្រាក់ គឺមានចំនួនតែ ៧០០ដុល្លារប៉ុណ្ណោះ ហើយសមត្ថកិច្ចកំពុងស្វែងរកជនសង្ស័យម្នាក់ទៀតឈ្មោះ ផន សុជាតិ ជាអ្នកយកព័ត៌មានឲ្យទូរទស្សន៍អប្សរា។
លេខាធិការដ្ឋានបណ្ដាញការពារព្រៃឡង់ លោក សេង សុខហេង កត់សម្គាល់ថា ករណីបែបនេះមិនមែនមានតែនៅខេត្តកំពង់ធំ នោះទេ ប៉ុន្តែនៅតំបន់ផ្សេងទៀត ពិសេសនៅតំបន់ដែលមានបទល្មើសច្រើនដូចជាបទល្មើសព្រៃឈើ បទល្មើសនេសាទ ការរុករានដីព្រៃ ជាដើម។ លោកបន្តថា ការជំរិតយកប្រាក់ពីពលរដ្ឋ ឬក្រុមជនល្មើស គឺកើតឡើងជាហូរហែ ហើយករណីទាំងនេះគឺបណ្ដាលឲ្យប៉ះពាល់ដល់អង្គការ ឬស្ថាប័នព័ត៌មានស្អាតស្អំ និងមានវិជ្ជាជីវៈ៖ «អ៊ីចឹងចំណុចនេះខ្ញុំគិតថាអាជ្ញាធរសមត្ថកិច្ច ឬស្ថាប័នពាក់ព័ន្ធ គួរតែពិនិត្យពិច័យ ឬក៏តាមដានរឿងនេះបន្តិច។ បើមិនចឹងទេ នឹងធ្វើឲ្យក្រុមឆក់ឱកាស ក្រុមឆ្លៀតឱកាសប្រព្រឹត្តទង្វើមួយដែលមិនត្រឹមត្រូវតាមច្បាប់»។
លោក សេង សុខហេង មើលឃើញថា ដើម្បីធ្វើឲ្យការបំពេញការងាររបស់អ្នកសារព័ត៌មាន និងមន្ត្រីអង្គការមួយចំនួនជៀសផុតពីការចោទប្រកាន់ផ្សេងៗ ពួកគេត្រូវប្រកាន់ក្រមសីលធម៌វិជ្ជាជីវៈត្រឹមត្រូវ ហើយប្រធានស្ថាប័នត្រូវត្រួតពិនិត្យ និងពង្រឹងវិន័យ ឬបទបញ្ជាផ្ទៃក្នុងដល់បុគ្គលិករបស់ខ្លួន។ លោកថា ដើម្បីឲ្យការអនុវត្តច្បាប់ស្មើភាពគ្នា រាជរដ្ឋាភិបាល និងតុលាការ ត្រូវស៊ើបអង្កេតទៅលើក្រុមអាជ្ញាធរ មន្ត្រីជំនាញ កងកម្លាំង ជាដើម ព្រោះរាល់បទល្មើសដែលកើតឡើង គឺដោយសារមានមន្ត្រីអនុវត្តន៍ច្បាប់មួយចំនួនជាអ្នកនៅពីក្រោយខ្នង ហើយអាចពាក់ព័ន្ធនឹងអំពើពុករលួយទៀតផង៕