មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យដឹងថា សន្លឹកឆ្នោតដែលបោះពុម្ពលើស ឬសន្លឹកឆ្នោតដែលបោះពុម្ពបម្រុងទុកត្រៀមបង្ការក្នុងថ្ងៃបោះឆ្នោត គិតមកដល់ពេលនេះនៅមិនទាន់ដឹងពីចំនួនដែលនៅសល់ពិតប្រាកដនៅឡើយទេ។ អង្គការមិនមែនរដ្ឋាភិបាលដែលឃ្លាំមើលពីដំណើរការបោះឆ្នោត យល់ឃើញថា សន្លឹកឆ្នោតដែលបោះលើសនេះ គឺរកមិនទាន់ឃើញពីការប្រើប្រាស់ក្នុងទិសដៅផ្សេង ក្រៅពីបម្រើឲ្យការបោះឆ្នោតនៅឡើយទេ។
សន្លឹកឆ្នោតដែលបោះពុម្ពលើសសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ នឹងត្រូវបំផ្លាញចោល ៣ឆ្នាំក្រោយ បន្ទាប់ពីរក្សាទុកនៅក្នុងឃ្លាំងរបស់ គ.ជ.ប រួច។
ថ្លែងប្រាប់ក្រុមអ្នកកាសែតនៅទីស្ដីការរបស់គណៈកម្មាធិការជាតិរៀបចំការបោះឆ្នោត កាលពីព្រឹកថ្ងៃទី១៣ ខែមិថុនា លោក ហង្ស ពុទ្ធា មន្ត្រីនាំពាក្យរបស់ គ.ជ.ប អះអាងថា សន្លឹកឆ្នោតដែលបោះពុម្ពបម្រុងទុកសម្រាប់ប្រើប្រាស់ពេលមានបញ្ហាកើតឡើងក្នុងពេលបោះឆ្នោតនេះ គឺមិនទាន់ដឹងពីចំនួនដែលនៅសល់ជាក់លាក់នៅឡើយទេ។ លោកបន្តថា ក្រោយពី គ.ជ.ប សម្អាតបញ្ជីរួចរាល់នៅក្រោយថ្ងៃប្រកាសលទ្ធផលឆ្នោតជាផ្លូវការ នឹងដឹងពីចំនួនដែលសល់ពិតប្រាកដ៖ «»។
លោក ហង្ស ពុទ្ធា ធ្លាប់អះអាងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ក្នុងអាណត្តិទី៤ នេះ គ.ជ.ប ដែលជាស្ថាប័នរៀបចំការបោះឆ្នោត បានបោះពុម្ពសន្លឹកឆ្នោតលើស ឬបម្រុងទុកចំនួន ២៥ភាគរយ។
នៅពេលមុនបោះឆ្នោត អ្នកជំនាញកិច្ចការបោះឆ្នោតបង្ហាញការព្រួយបារម្ភចំពោះសន្លឹកឆ្នោតដែល គ.ជ.ប បោះពុម្ពលើសរហូតដល់ ២៥ភាគរយ ខណៈប្រទេសជឿនលឿនមួយចំនួន សន្លឹកឆ្នោតដែលបោះពុម្ពលើសនេះ សង្គមស៊ីវិលដែលឃ្លាំមើលពីដំណើរការបោះឆ្នោតអះអាងថា យ៉ាងច្រើនណាស់ត្រឹម ៧ភាគរយប៉ុណ្ណោះ។
បើទោះជាបែបណាក្ដី អ្នកសម្របសម្រួលផ្នែកអង្កេតនៃអង្គការខុមហ្វ្រែល (COMFREL) លោក កន សាវាង្ស ថ្លែងថា ថ្វីបើសន្លឹកឆ្នោតដែលបោះពុម្ពលើសនេះមានចំនួនច្រើនហួសពីអ្វីដែលសង្គមស៊ីវិលបានគិតថា អាចនឹងប្រើក្នុងទិសដៅផ្សេងនាំឲ្យបាត់បង់តម្លាភាព ប៉ុន្តែធាតុពិត សន្លឹកឆ្នោតដែលបោះពុម្ពបម្រុងនេះ គឺនៅមិនទាន់មានបញ្ហាកើតឡើងដោយសារការបោះពុម្ពលើសនេះនៅឡើយទេ៖ «»។
មន្ត្រីគណៈកម្មាធិការជាតិរៀបចំការបោះឆ្នោត ឲ្យដឹងថា សម្រាប់សន្លឹកឆ្នោតដែលបោះពុម្ពលើសបម្រើឲ្យការបោះឆ្នោតជ្រើសរើសក្រុមប្រឹក្សាឃុំ-សង្កាត់ គឺគេអាចរក្សាទុកនៅឃ្លាំង គ.ជ.ប បានរយៈពេល ៣ឆ្នាំ មុននឹងត្រូវបំផ្លាញចោល។ ដោយឡែកសន្លឹកឆ្នោតដែលបោះពុម្ពលើសសម្រាប់បោះឆ្នោតជ្រើសតាំងតំណាងរាស្ត្រវិញ គឺគេត្រូវរក្សាទុករយៈពេល ៦ឆ្នាំ ទើបត្រូវកម្ទេចចោល។
យ៉ាងណា ការរៀបចំ និងការប្រព្រឹត្តទៅរបស់ គ.ជ.ប សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅក្នុងអាណត្តិទី៤ នេះ ក្រុមអង្គការមិនមែនរដ្ឋាភិបាលដែលឃ្លាំមើលពីដំណើរការបោះឆ្នោត ចាត់ទុកថាមានដំណើរការទៅល្អ និងអាចទទួលយកបាន ទាំងនីតិវិធី និងបច្ចេកទេស៕