Clik here to view.
ទំនាស់ដីធ្លីរវាងពលរដ្ឋខ្លះជាមួយនឹងក្រុមហ៊ុនរុករករ៉ែមាសនៅឃុំរមទម ស្រុករវៀង ខេត្តព្រះវិហារ កំពុងកើតមានជាបន្តបន្ទាប់ ប៉ុន្តែមិនមានអាជ្ញាធរណាចេញមុខទៅដោះស្រាយនៅឡើយទេ។
ប្រជាពលរដ្ឋខ្លះដែលជាជនជាតិដើមភាគតិចកួយ កំពុងស្វះស្វែងរកអាជ្ញាធរភូមិ ឃុំ និងស្រុក ដើម្បីឲ្យជួយការពារដីស្រែចម្ការរបស់ពួកគេនៅតំបន់ភ្នំអន្លង់ ដើម្បីកុំឲ្យក្រុមហ៊ុនមានអំណាចរំលោភយកបានតទៅទៀត។
ប្រជាពលរដ្ឋ ១២គ្រួសារនៅភូមិត្រពាំងទទឹម នៃឃុំរមទម អំពាវនាវឲ្យអាជ្ញាធរឃុំនេះ ព្រមទាំងមន្ត្រីស្រុករវៀង ជួយដោះស្រាយជាបន្ទាន់ទៅលើសកម្មភាពរបស់ក្រុមហ៊ុនរុករករ៉ែមាសឈ្មោះ ឌែលខម កម្ពុជា (Delcom Cambodia) ដែលកំពុងតែរំលោភយកដីស្រែចម្ការជាច្រើនហិកតារ។
ការអំពាវនាវ ធ្វើឡើងបន្ទាប់ពីពួកគេអះអាងថា រយៈពេល ២-៣ថ្ងៃមកហើយ ក្រុមហ៊ុនរុករករ៉ែមាសរបស់ចិន នោះ បានឈូសរំលោភលើដីមានផលដំណាំ ព្រមទាំងធ្វើរបងហ៊ុមព័ទ្ធយកដីជាបន្តបន្ទាប់។
អ្នកភូមិត្រពាំងទទឹម ម្នាក់ក្នុងចំណោមអ្នកមានទំនាស់ដីធ្លីនោះ គឺលោក ឈិត យី។ លោកមានប្រសាសន៍នៅព្រឹកថ្ងៃអង្គារ ទី១៣ ខែមិថុនា ថា ដីស្រែចម្ការរបស់គាត់ទំហំ ១២ហិកតារនៅជិតតំបន់ភ្នំអន្លង់ គឺក្រុមហ៊ុនកំពុងរំលោភយករយៈពេល ៣-៤ថ្ងៃជាប់គ្នានេះ។ លោក ឈិត យី ព្រួយបារម្ភខ្លាចបាត់បង់ដីស្រែចម្ការទាំងស្រុងនៅពេលឆាប់ៗ ប្រសិនបើអាជ្ញាធរឃុំរមទម និងស្រុករវៀង នៅតែមិនចេញមុខដោះស្រាយទេ៖ «គេឈូសយកដីរបស់ខ្ញុំរាល់ថ្ងៃ តើខ្ញុំមានអ្វីទៀតដើម្បីរកលុយទៅសងមីក្រូហិរញ្ញវត្ថុ ដែលខ្ញុំជំពាក់គេ? ដីរបស់ខ្ញុំទំហំ ១២ហិកតារ គេឈូសយកទាំងអស់ ទាំងដំណាំនៅក្បែរផ្ទះ ក៏គេឈូសកាយចោល»។
ពលរដ្ឋបានចោទប្រកាន់ក្រុមហ៊ុនចិន ឌែលខម កម្ពុជា (Delcom Cambodia) ថាកំពុងប្រើគ្រឿងចក្រឈូសឆាយ ព្រមទាំងធ្វើរបងហ៊ុមព័ទ្ធយកដីរបស់អ្នកភូមិចំនួន ១២គ្រួសារ។
ទោះជាយ៉ាងណា អាស៊ីសេរី មិនអាចទាក់ទងតំណាងក្រុមហ៊ុន ឌែលខម (Delcom Cambodia) ដើម្បីសុំការបំភ្លឺជុំវិញការចោទប្រកាន់របស់ពលរដ្ឋនេះបានថាយ៉ាងណានៅឡើយនៅថ្ងៃទី១៣ ខែមិថុនា។
ចំណែកមេឃុំរមទម លោក ប្រាក់ ផន ទទួលស្គាល់ថា ក្រុមហ៊ុន ឌែលខម ពិតជាមានទំនាស់ដីធ្លីជាមួយប្រជាពលរដ្ឋនៅភូមិត្រពាំងទទឹម នោះខ្លះមែន ហើយអាជ្ញាធរឃុំក៏តែងជួយដោះស្រាយ ប៉ុន្តែមេឃុំរមទម មិនបានបញ្ជាក់ឲ្យដឹងជុំវិញការជួយដោះស្រាយនោះធ្វើអ្វីខ្លះទេ ដោយលោកប្រាប់ថា កំពុងជាប់រវល់ប្រជុំ៖ «មែនមិនឃុំមិនជួយដោះស្រាយប្រជាពលរដ្ឋទាំងនោះទេ គឺធ្លាប់ជួយដោះស្រាយជាហូរហែ»។
កាលពីថ្ងៃទី៣០ ខែឧសភា អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ ធ្លាប់ព្រួយបារម្ភចំពោះបញ្ហាដែលក្រុមហ៊ុនរ៉ែមាសនោះរំលោភយកដីប្រជាពលរដ្ឋកាន់តែច្រើនឡើងៗ។ លោក ឡោ ចាន់ ស្នើសុំឲ្យរដ្ឋាភិបាលពិនិត្យមើលឡើងវិញចំពោះក្រុមហ៊ុនយកកម្លាំងទាហានខ្លះទៅកាងនៅក្នុងតំបន់រុករករ៉ែមាសនោះ៕
