គណបក្សសង្គ្រោះជាតិ ខែត្រស្ទឹងត្រែង បានដាក់ពាក្យប្ដឹងទៅគណៈកម្មការខែត្ររៀបចំការបោះឆ្នោត ទាមទារឲ្យ គ.ជ.ប រាប់សន្លឹកឆ្នោតឡើងវិញនៅឃុំចំនួន៤។ ចំណែកគណៈកម្មការខែត្ររៀបចំការបោះឆ្នោត កំពុងសម្របសម្រួលបញ្ហានេះ។
មន្ត្រីគណបក្សសង្គ្រោះជាតិ ខែត្រស្ទឹងត្រែង ទាមទារឲ្យគណៈកម្មការខែត្ររៀបចំការបោះឆ្នោត (គ.ខ.ប) ពិនិត្យប្រសិទ្ធភាពសន្លឹកឆ្នោតនៅឃុំចំនួន៤ នៅខែត្រស្ទឹងត្រែង ឡើងវិញ ក្រោយពីរកឃើញថា ឃុំទាំងនោះមានសន្លឹកឆ្នោតមិនបានការច្រើន។
អនុប្រធានគណបក្សសង្គ្រោះជាតិ ខែត្រស្ទឹងត្រែង លោក សាត ស៊ិន ឲ្យដឹងនៅថ្ងៃទី៧ មិថុនា ថា មូលហេតុដែលគណបក្សសង្គ្រោះជាតិ ទាមទារឲ្យ គ.ខ.ប រាប់សន្លឹកឆ្នោតនៅឃុំទាំងនោះឡើងវិញ ដោយសារការរាប់សន្លឹកឆ្នោតនៅឃុំទាំងនោះមានភាពមិនប្រក្រតីមួយចំនួន និងមានសន្លឹកឆ្នោតមិនបានការច្រើន។ លោកថា ឃុំដែលមានសន្លឹកឆ្នោតមិនបានការច្រើន រួមមានឃុំអន្លង់ភេ ឃុំស្រែឫស្សី ឃុំស្ដៅ និងសង្កាត់សាមគ្គី។
លោកកត់សម្គាល់ថា គណៈកម្មការរៀបចំការបោះឆ្នោតសង្កាត់សាមគ្គី មិនបានចម្លងទម្រង់ ១១០២ ឬហៅថាលទ្ធផលបោះឆ្នោតបឋមដល់ភ្នាក់ងារគណបក្សសង្គ្រោះជាតិ នោះទេ។ បញ្ហានេះផ្ទុយពីគោលការណ៍ណែនាំរបស់ គ.ជ.ប៖ «ដោយសារមានការចង្អុលបង្ហាញពីភ្នាក់ងារយល់ថា សន្លឹកឆ្នោតដែលមិនបានការវាច្រើនលើសពីចំនួនដែលកំណត់កៅអីរបស់ឃុំ។ ឧបមាថា គណបក្សសង្គ្រោះជាតិ បើសិនជារាប់ពិតប្រាកដ វាបានពីរកៅអី ប៉ុន្តែនៅពេលភ្នាក់ងារយើងគ្នាមិនសូវហ៊ានតវ៉ា តវ៉ាមិនឈ្នះគេលទ្ធផលហ្នឹង គេចាប់ទុកថាលទ្ធផលមិនបានការ»។
នៅខែត្រស្ទឹងត្រែង មានការិយាល័យបោះឆ្នោតចំនួន២០៧ និងមានឃុំ-សង្កាត់ចំនួន៣៤។ ខែត្រនេះមានពលរដ្ឋទៅបោះឆ្នោតចំនួនជាង ៩០ភាគរយ (៩០,១២%) ក្នុងចំណោមពលរដ្ឋជាង ៧ម៉ឺននាក់ (៧១.០២៨នាក់) មានឈ្មោះក្នុងបញ្ជីបោះឆ្នោត។
ប្រធានគណៈកម្មការខែត្ររៀបចំការបោះឆ្នោត លោក ពុយ ចាន់ថាឡាក់ ឲ្យដឹងនៅថ្ងៃទី៧ មិថុនា ថា គណៈកម្មការរៀបចំការបោះឆ្នោតខែត្រ បានទទួលពាក្យបណ្ដឹងរបស់គណបក្សសង្គ្រោះជាតិ រួចហើយ និងកំពុងសម្របសម្រួលបញ្ហានេះ ក៏ប៉ុន្តែបើដោះស្រាយមិនបានទេ ដើមបណ្ដឹងអាចមានសិទ្ធិប្ដឹងទៅគណៈកម្មាធិការជាតិរៀបចំការបោះឆ្នោត។ លោកបញ្ជាក់ថា ការរាប់សន្លឹកឆ្នោតឡើងវិញបាន លុះត្រាតែមានភាពមិនប្រក្រតីធ្ងន់ធ្ងរ៖ «ខ្ញុំគិតថាលទ្ធផលដែលគេរាប់តាមក្រោយហ្នឹង ជាលទ្ធផលដែលគេរាប់ត្រឹមត្រូវហើយ។ យើងទទួលស្គាល់លទ្ធផលហ្នឹង ដូច្នេះយើងមិនអាចរាប់បានតាមបណ្ដឹងរបស់គាត់ទេ»។
នាយកប្រតិបត្តិអង្គការនិកហ្វិច (NICFEC) លោក សំ គន្ធាមី យល់ថា ការរាប់សន្លឹកឆ្នោតអាស្រ័យលើតំណាងគណបក្សនយោបាយនានាពិនិត្យមើលទាំងអស់គ្នា ផ្អែកតាមគំរូសន្លឹកឆ្នោតរបស់ គ.ជ.ប បានកំណត់ ក៏ប៉ុន្តែបើតំណាងគណបក្សណាមិនយល់ស្រប អាចដាក់ពាក្យបណ្ដឹងបាន។
លោកបញ្ជាក់ថា ប្រសិនបើករណីនេះមានលក្ខណៈធ្ងន់ធ្ងរ គ.ជ.ប អាចសម្រេចបើកកញ្ចប់សន្លឹកឆ្នោតពិនិត្យសាជាថ្មីតាមនីតិវិធី៖ «អាហ្នឹងអាស្រ័យលើអ្នកអង្កេតហ្នឹង បើគេមិនយល់ស្រប គេដាក់បណ្ដឹងតវ៉ាទៅ រួចគេមានគំរូសន្លឹកឆ្នោតតើ!»។
លទ្ធផលបឋមនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នៅខែត្រស្ទឹងត្រែង បង្ហាញថា គណបក្សប្រជាជនកម្ពុជា ទទួលបាន ១៣២អាសនៈ គណបក្សសង្គ្រោះជាតិ ទទួលបាន ៣៩អាសនៈ និងគណបក្សហ៊្វុនស៊ិនប៉ិច ទទួលបាន ៥អាសនៈ ក្នុងចំណោមអាសនៈសរុបចំនួន ១៧៦។
ខែត្រនេះមានគណបក្សនយោបាយចំនួន៤ ដាក់បេក្ខជនឈរឈ្មោះក្រុមប្រឹក្សាឃុំ-សង្កាត់ រួមមាន៖
-
គណបក្សប្រជាជនកម្ពុជា
-
គណបក្សសង្គ្រោះជាតិ
-
គណបក្សហ្វ៊ុនស៊ិនប៉ិច
-
និង គណបក្សខ្មែររួបរួមជាតិ៕