អាជ្ញាធរក្រុងតាខ្មៅឃាត់រថយន្តរបស់សមាជិកគណបក្សសង្រ្គោះជាតិចំនួនពីរគ្រឿង ដែលមានគ្នាជាង២០នាក់ មិនអនុញ្ញាតឲ្យធ្វើដំណើរបន្តមកទីក្រុងភ្នំពេញ ដើម្បីជួបជុំគ្នានៅវត្តចាស់ ដែលជាទីកន្លែងគណបក្សសង្រ្គោះជាតិរៀបចំក្បួនហែឃោសនានៅរសៀលថ្ងៃទី២ មិថុនា។
សមាជិកគណៈកម្មាធិការប្រតិបត្តិគណបក្សសង្រ្គោះជាតិ ខេត្តតាកែវ លោក ដុស និច ឲ្យដឹងថា អាជ្ញាធរក្រុងតាខ្មៅ ឃាត់រថយន្តរបស់ពួកគាត់តាំងម៉ោង៨ព្រឹក ដោយអាជ្ញាធរលើកហេតុផលថា គណៈកម្មាធិការជាតិរៀបចំការបោះឆ្នោត (គ.ជ.ប) មិនអនុញ្ញាតឲ្យសមាជិកគណបក្ស នយោបាយមកជួបជុំគ្នាហែក្បួនឃោសនាឆ្លងសង្កាត់ទេ។ ទោះបីជាយ៉ាងនេះក្ដី លោក បញ្ជាក់ថា ថ្ងៃសុក្រ ទី២ មិថុនានេះ ជាការជួបជុំគ្នាហែក្បួនឃោសនាជាទ្រង់ទ្រាយធំរបស់គណបក្សសង្រ្គោះជាតិ ដូច្នេះពួកគាត់ត្រូវពុះពារមកជួបជុំគ្នានៅវត្តចាស់ឲ្យខាងតែបាន។
គ.ជ.ប បានចេញសេចក្ដីប្រកាសព័ត៌មានកាលពីថ្ងៃទី១ មិថុនា ថា គ.ជ.ប បានចេញលិខិតមួយច្បាប់ជូនគណបក្សសង្រ្គោះជាតិ ពាក់ព័ន្ធនឹងការហែក្បួនឃោសនាបោះឆ្នោតនៅថ្ងៃទី២ មិថុនា ឆ្នាំ២០១៧ ដែលជាថ្ងៃចុងបញ្ចប់ឃោសនាបោះឆ្នោត។ យោងតាមសំណើរបស់រដ្ឋបាលសាលារាជធានីភ្នំពេញ គ.ជ.ប បានរំលឹកដល់គណបក្សសង្រ្គោះជាតិថា ប្រសិនបើគណបក្សសង្រ្គោះជាតិបានកៀរគរអ្នកគាំទ្រពីតាមខេត្តតាកែវ កំពង់ឆ្នាំង កំពង់ចាម និងខេត្តត្បូងឃ្មុំ មកចូលរួមដង្ហែក្បួនឃោសនានៅរាជធានីភ្នំពេញ ដូចដែលសាលារាជធានីបានទទួលព័ត៌មានមែន ជាហេតុធ្វើឲ្យកកស្ទះចរាចរ ប៉ះពាល់ដល់សណ្ដាប់ធ្នាប់សាធារណៈ និងផ្ទុយពីកំណត់ហេតុចុះថ្ងៃទី១ មិថុនា ឆ្នាំ២០១៧ រវាងសាលាក្រុង គ.ជ.ប និងគណៈកម្មាធិការប្រតិបត្តិគណបក្សសង្រ្គោះជាតិរាជធានីភ្នំពេញ។
ទោះបីជាបែបនេះក្ដី នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ឬហៅថាអង្គការនិចហ្វិក (NICFEC) លោក សំ គន្ធាមី មានប្រសាសន៍ថា ការលើកហេតុផលរបស់គ.ជ.ប និងសាលារាជធានីភ្នំពេញនេះ ជាហេតុផលដើម្បីកេងចំណេញនយោបាយច្រើនជាង។ លោកបញ្ជាក់ថា ច្បាប់បោះឆ្នោតជ្រើសរើសក្រុមប្រឹក្សាឃុំសង្កាត់ ពុំបានហាមឃាត់សមាជិកគណបក្សនយោបាយណាមួយក្នុងការហែក្បួនឃោសនា ឆ្លងពីតំបន់មួយទៅតំបន់មួយទៀតនោះឡើយ។ លោកបន្ថែមថា បើសិនជាគ.ជ.ប លើកពីការហែក្បួនឃោសនាចល័តទីតាំងមិនបានដូច្នេះ តើប្រធានគណបក្សដែលដើរឃោសនាតាមបណ្ដាខេត្តនានានោះ ជារឿងខុសច្បាប់ដែរឬយ៉ាងណា?៕
សូមទស្សនាការផ្សាយពិសេសនៃការហែឃោសនាថ្ងៃចុងក្រោយនារាជធានីភ្នំពេញដូចតទៅ