សហភាពអឺរ៉ុប ពន្យារពេលការចូលជាធរមាននៃបទប្បញ្ញត្តិថ្មី ដែលប្រកាសឈប់ទិញអង្ករដែលមានផ្ទុកសារធាតុថ្នាំសម្លាប់ស្មៅទ្រីហ្ស៊ីក្លាហ្សូល (Tricyclazole) លើសកម្រិត ពីខែកក្កដា ទៅចុងខែកញ្ញា វិញ។ ការប្រកាសពន្យារពេលនេះ ត្រូវបានធ្វើឡើងនៅក្រោយជំនួបរបស់ឯកអគ្គរដ្ឋទូតសហភាពអឺរ៉ុប ប្រចាំនៅកម្ពុជា ជាមួយប្រធានសហព័ន្ធស្រូវអង្ករកម្ពុជា លោក សុខ ពុទ្ធីវុធ កាលពីថ្ងៃទី២ ឧសភា។
សេចក្តីជូនដំណឹងរបស់សហព័ន្ធស្រូវអង្ករកម្ពុជា ចេញផ្សាយនៅថ្ងៃទី៣០ ឧសភា ឲ្យដឹងថា នៅក្នុងជំនួបនោះ សហភាពអឺរ៉ុប បានបង្ហាញពីភាពវិជ្ជមាន គឺពន្យារការនាំចូលជាធរមានក្នុងការអនុវត្តបទប្បញ្ញត្តិថ្មីរបស់សហភាពអឺរ៉ុប ដែលបានប្រកាសហាមឃាត់ការនាំចូលអង្ករដែលមានសារធាតុថ្នាំសម្លាប់ស្មៅមានផ្ទុកសារធាតុសកម្មទ្រីហ្ស៊ីក្លាហ្សូល (Tricyclazole) លើសពី ០,០១មិល្លីក្រាមក្នុងអង្ករមួយគីឡូក្រាម។
កាលពីដើមឆ្នាំ២០១៧ សហភាពអឺរ៉ុប បានប្រកាសថា ចាប់ពីខែកក្កដា ឆ្នាំ២០១៧ តទៅ សហភាពអឺរ៉ុប នឹងហាមឃាត់ការនាំចូលអង្ករពីគ្រប់ប្រទេសអាស៊ាន ដែលមានផ្ទុកសារធាតុថ្នាំសម្លាប់ស្មៅទ្រីហ្ស៊ីក្លាហ្សូល លើសកម្រិត។
ក្រោយពីសហភាពអឺរ៉ុប ប្រកាសឈប់ទិញអង្ករពីបណ្ដាប្រទេសណាដែលមានផ្ទុកសារធាតុថ្នាំសម្លាប់ស្មៅទ្រីហ្ស៊ីក្លាហ្សូល លើសកម្រិត អគ្គនាយកដ្ឋានកសិកម្មនៃក្រសួងកសិកម្ម បានចេញវិធានការត្រួតពិនិត្យ ឬស្កែន (Scan) គ្រប់ឃ្លាំងស្រូវទាំងអស់ទូទាំងប្រទេសកម្ពុជា ដើម្បីទប់ស្កាត់មិនឲ្យម្ចាស់ឃ្លាំងស្រូវណាដែលមានស្រូវស្ដុកសារធាតុទ្រីហ្ស៊ីក្លាហ្សូល (Tricyclazole) លើសពី ០,០១មិល្លីក្រាមក្នុងអង្ករមួយគីឡូក្រាម មិនអនុញ្ញាតឲ្យនាំអង្ករចេញទៅកាន់ទីផ្សារអឺរ៉ុប ទេ។
អ្នកជំនាញផ្នែកកសិកម្ម យល់ថា ចំណាត់ការរបស់ក្រសួង ត្រួតពិនិត្យស្រូវអង្កររកសារធាតុថ្នាំសម្លាប់ស្មៅទ្រីហ្ស៊ីក្លាហ្សូល (Tricyclazole) គឺជាមធ្យោបាយដែលនឹងជួយឲ្យការនាំចេញរបស់កម្ពុជា ទៅកាន់ទីផ្សារសហភាពអឺរ៉ុប ឆ្នាំ២០១៧ ជោគជ័យ។ ប៉ុន្តែប្រសិនបើក្រសួងកសិកម្ម ធ្វើមិនជោគជ័យករណីពិនិត្យស្រូវតាមឃ្លាំងអង្ករនោះទេ អង្ករកម្ពុជា នឹងប្រឈមការបញ្ជូនពីទីផ្សារអឺរ៉ុប មកឲ្យកម្ពុជា វិញ ដូចករណីទំនិញប្រទេសវៀតណាម ដែលត្រូវបានទីផ្សារអន្តរជាតិបញ្ជូនទៅឲ្យវៀតណាម វិញដូច្នោះដែរ៕