ក្មេងកំព្រា ៤នាក់ដែលម្ដាយស្លាប់ដោយសារម៉ូតូបុកពេលដើរឃោសនារកសំឡេងឆ្នោតរបស់គណបក្សសង្គ្រោះជាតិ ខេត្តពោធិ៍សាត់ កំពុងជួបបញ្ហាជីវភាពធ្ងន់ធ្ងរ និងជំពាក់បំណុលធនាគារ។ សាច់ញាតិរបស់ក្មេងទាំង ៤នាក់ អំពាវនាវដល់សប្បុរសជនទាំងក្នុង និងក្រៅប្រទេស ជួយឧបត្ថម្ភធនធានតាមលទ្ធភាព ដើម្បីដោះបំណុលធនាគារ និងឲ្យក្មេងបានរៀនបន្ត។
ក្មេងស្រី ៣នាក់ និងប្រុសម្នាក់ ដែលមានអាយុចន្លោះពី ១០ឆ្នាំទៅ ១៧ឆ្នាំ កំពុងរស់នៅតែលតោលគ្មានឪពុកម្ដាយ នៅភូមិឆ្លងកាត់ សង្កាត់រលាប ក្រុងពោធិ៍សាត់។ ឪពុកម្ដាយរបស់ពួកគេបានស្លាប់ដោយគ្រោះថ្នាក់ចរាចរណ៍ទាំងពីរនាក់ ក្នុងហេតុការណ៍គ្រោះថ្នាក់ពីរផ្សេងគ្នា ដោយម្ដាយត្រូវម៉ូតូបុកស្លាប់ពេលដើរឃោសនារកសំឡេងឆ្នោតនៅក្រុងពោធិ៍សាត់ កាលពីម៉ោងជិត ១១ព្រឹកថ្ងៃទី២៤ ឧសភា។
បងស្រីបង្កើតរបស់សពឈ្មោះ ង៉ែត សុភាព គឺលោកស្រី ង៉ែត សារ៉ុម ឲ្យដឹងនៅថ្ងៃទី២៧ ខែឧសភា ថា រូបគាត់បានធ្វើជាតំណាងដើមបណ្ដឹង ប្ដឹងក្មេងស្ទាវពីរនាក់ដែលបានជិះម៉ូតូបុកប្អូនស្រីរបស់គាត់បណ្ដាលឲ្យស្លាប់ ទៅនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់ ដើម្បីឲ្យជួយរកយុត្តិធម៌ហើយ ប៉ុន្តែមិនទាន់សម្រេចថានឹងទាមទារសំណងប៉ុន្មានពីជនល្មើសទេ៖ «ខាងគណបក្សបានអំពាវនាវជួយបានខ្លះៗជាបន្តបន្ទាប់ បានធ្វើបុណ្យរួចចប់សព្វគ្រប់ អត់ជំពាក់អីវ៉ាន់គេទេ។ ប៉ុន្តែអំពាវនាវសប្បុរសជនជួយក្មេងកំព្រាអត់ទីពឹង អត់ពីឪពុក អត់ពីម្ដាយទៅ មិនដឹងថារស់នៅយ៉ាងម៉េច? ជីវភាពយ៉ាងម៉េច? ការហូបចុក ឬរៀនសូត្របាន ឬអត់ទេ? សូមសប្បុរសជនជួយដល់ក្មេងកំព្រាទាំងបួននាក់ផង»។
លោកស្រី ង៉ែត សារ៉ុម ស្នើឲ្យសមត្ថកិច្ចតាមចាប់ខ្លួនជនល្មើសម្នាក់ក្នុងចំណោមពីរនាក់ដែលបានរត់គេចខ្លួនក្រោយបានបង្កហេតុ ដើម្បីយកមកដោះស្រាយជាមួយគ្រួសារជនរងគ្រោះឲ្យបានឆាប់។
សកម្មជនគណបក្សសង្គ្រោះជាតិ និងជាបេក្ខនារីឈរឈ្មោះលេខរៀងទី៣ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅសង្កាត់រលាប ក្រុងពោធិ៍សាត់ ត្រូវម៉ូតូបុកពេញទំហឹងអូសប្រហែល ៥ម៉ែត្រ នៅចំណុចផ្លូវកោងក្នុងភូមិព្រែកត្នោត សង្កាត់រលាប នៅគ្រាដែលគាត់កំពុងដើរតាមផ្លូវផ្នែកខាងស្ដាំ ក្រោយចេញពីបិទខិត្តប័ណ្ណគោលនយោបាយបក្សនៅក្នុងផ្ទះប្រជាពលរដ្ឋ។
អាស៊ីសេរី មិនអាចសុំការអត្ថាធិប្បាយជុំវិញបញ្ហានេះពីប្រធានការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់ លោក រស់ ចំរើន បានទេ ដោយទូរស័ព្ទចូលពុំមានអ្នកទទួល។
ចំណែកមន្ត្រីសម្របសម្រួលអង្គការលីកាដូ (LICADHO) ខេត្តពោធិ៍សាត់ លោក អេង ឈុនហាន ថាលោកនឹងស្វែងរកជួបជនបង្កម្នាក់ដែលរត់គេចខ្លួន ដើម្បីសម្ភាសចង់ដឹងរឿងរ៉ាវពិតដែលបានកើតឡើង។
សាច់ញាតិរបស់សពលោកស្រី ង៉ែត សុភាព ឲ្យដឹងថា កាលពីឆ្នាំមុន លោកស្រី ង៉ែត សុភាព និងប្ដីបានខ្ចីលុយពីធនាគារប្រមាណ ១ម៉ឺនដុល្លារ ដើម្បីទិញឡានរត់ឈ្នួល និងសល់លុយខ្លះជួសជុលផ្ទះ។ ប៉ុន្តែជាអកុសល ប្ដីគាត់ត្រូវស្លាប់ដោយគ្រោះថ្នាក់ចរាចរណ៍មុនគាត់មួយឆ្នាំ ហើយបន្ទុកចិញ្ចឹមកូន និងរកលុយបង់ធនាគារ បានធ្លាក់លើគាត់។ កាលនៅរស់ លោកស្រី ង៉ែត សុភាព បានរកស៊ីលក់ភ្លៅមាន់ និងកង្កែបបោប៕